Uppsveita-Rangæingurinn Bessi Theodórsson svaraði nokkrum jólaspurningum fyrir sunnlenska.is.
Hvort ertu meiri skröggur eða jólaálfur? Ég var alltaf gríðarlega mikill jólakrakki. Jólin voru og eru mikil hátíð í Litlagerðinu á Hvolsvelli. Hefðir sem skiptu mann miklu máli og hafa fylgt manni alla tíð að einhverju leyti. Sem ungur maður, kominn yfir tvítugt minnkaði aðeins jólaálfsfílíngurinn og rúllaði kannski aðeins í Skrögginn. En það varði blessunarlega ekki lengi og er ég núna alger Jólastrumpur. Elska þennan tíma, veðrið, samveru, jólapeysur, skreytingar og jólaljós og þetta allt saman. Reyni að fara í skötu á Þollák og nýt þess að halda gleðileg jól alla jóladagana. Verandi mikill aðdáandi matar og drykkjar er þetta gósen tíð.
Uppáhalds jólasveinn? Ég hreinlega man ekki hvort ég átti minn uppáhalds sem krakki en það hlýtur að vera, mögulega Stúfur minn. En ég upplifi sterkt með sonum mínum, Baltasar fyrst og svo Eysteini núna, aðdraganda jóla og spenninginn með jólasveinana. Kertasníkir hefur verið í hávegum hafður og ekki síst núna undanfarin jól þegar hann kemur með í skóinn fyrir alla fjölskylduna. Og aldrei verður maður var við kallinn, þetta er alveg magnað.
Uppáhalds jólalag? Ást og hatur einkennir jólalögin og sér í lagi hvenær þau eiga að fara heyrast. ENGIN JÓLALÖG FYRR EN Í DESEMBER! Kannski aðeins í nóvember og mögulega nokkur vel valin í lok október. Það er svo mikil flóra í jólalögunum og mörg af þeim sem eru að koma út ár hvert eru býsna góð, vel samin og fallegur texti. Gömlu „góðu“ jólalögin hljóma ekki endilega mikið í mínum eyrum. Þó er eitt með gömlu „góðu“ klisju jólalögin. Ég syng þau alltaf hástöfum og af innlifun í júní og júlí, klikkar ekki og ég hef ekki hugmynd hvers vegna. Svo ef þú hefur það alveg fyrir þig og ferð ekki með það lengra þá get ég sagt þér að ein af myrkustu sakbitnu sælunni minni er lagið „All I Want for Christmas“ með Maríuh Carey. Drelli hressandi lag.
Uppáhalds jólamynd? Get horft á þetta flest svona í kósýkvöldi með fjölskyldunni. Veit ekki með bestu myndirnar en ég er basic bit%# og hef gaman að klassískum Christmas Vacation og Die Hard, sem er sannarlega jólamynd.
Uppáhalds jólaminning? Mamma skreytti alltaf jólatréð á Þorláksmessu. Það var heilög stund og sterkasta jólaminningin mín er að læðast fram á jólanótt eða allavega einhverja nótt yfir jólin og labba myrkvaðan ganginn í átt að stofunni og sjá bjarmann og svo loksins að sjá tréð birtast manni í allri sinni dýrð. Það var svo fallegt og hátíðlegt í kyrrðinni og myrkrinu.
Uppáhalds jólaskraut? Jólaserían á jólatrénu hjá mömmu, engin spurning. Marglit ljós á hvítum stilk sem var klemmd á greinarnar. Var örugglega búin að vera á trénu mörg ár fyrir mína tíð og var svo alla mína tíð og ég held að hún sé ennþá í notkun. Man vel eftir að það varð sífellt erfiðara og erfiðara að finna litlu skrúfuperurnar í hana og sérstaklega í litum. Pabbi var með þessa seríu í höndunum nokkrum sinnum man ég, eitthvað að laga og halda gangandi. Pabbi var alltaf jólaseríuhvíslari, átti allar perur til á góðum stað og skipti út eftir þörfum. Kenndi mér snemma hvernig átti að taka peru í lagi og setja hana í staðin fyrir eina bilaða og ef það hjálpaði ekki að færa þá peruna í næsta og svo koll af kolli þar til að ljós logaði á öllu.
Minnistæðasta jólagjöfin? Margt hefur maður verið heppinn að fá í pakka en ætli tæknilego grafan sem ég fékk einhver jólin sé ekki minnisstæðust. Það var fyrsta eða önnur gjöfin sem ég opnaði og ég byrjaði strax að setja saman og klippa gúmmíslöngur fyrir loft tjakkana, rosa græja sko. Kvöldið fór í þetta og ég átti svo óopnaðar gjafir á jóladagsmorgun. Það hafði aldrei gerst áður og hefur ekki gerst síðan.
Hvað finnst þér ómissandi að gera fyrir hver jól? Það var alltaf farið í kirkju á mínu heimili og komið heim rétt um sex þegar jólin hringdu inn. Það var ómissandi partur af jólahaldi minnar æsku. Á einhverjum tímapunkti var ég ekki alveg jafn spenntur fyrir þessum kirkjuferðum en ég hugsa um það með mikilli gleði í dag, hlý og góð minning. Núna er ómissandi partur af jólum að fara í kirkjugarðinn og kveikja ljós hjá fólkinu sínu.
Hvað er í jólamatinn? Við borðum hamborgarhrygg á aðfangadagskvöldi. Möndlugraut í hádeginu. Afgangar á jólanótt og svo allskyns kjöt í óhófi alla jólahátíðina. Og ekki skulum við gleyma súkkulaðinu og heimagerða ísnum. Ég er mest spenntur fyrir matnum og elda hrygginn af mikilli natni.
Ef þú ættir eina jólaósk? Jólin og þessi tími gerir mann meyran og vill maður óska þess að fjölskylda, vinir og landsmenn allir eigi góða daga. Heimurinn allur sættist og gleði ríki.