Bókaútgáfan Sæmundur efnir til útgáfuhófs í Eymundsson Smáralind í Kópavogi fimmtudagskvöldið 11. október klukkan 20:00 til 21:00. Lilja Magnúsdóttir kennari og bóndi á Kirkjubæjarklaustri les úr sinni fyrstu bók sem heitir Svikarinn.
Ólöf Benediktsdóttir listakona syngur nokkur lög við undirleik Ara Árilíusar.
Rautt, hvítt og barnvænir bílstjóradrykkir í boði.
Hér segir frá því hvað gerist þegar fjölskipað er í hjónabandi. Það er sjaldnast heppilegt að þar séu þrír og þegar það eru orðnir fjórir hlýtur eitthvað að springa.
Sprengingin verður þegar þegar ung kona verður viðskila við ástmann sinn og hefur enga hugmynd um afdrif hans. Þau höfðu lengi leikið tveim skjöldum og talið sér trú um að það væri í lagi. Þau voru saman í feluleiknum en þegar hann hverfur kemur margt óvænt í ljós.
Enginn flýr frá sjálfum sér og draugar fortíðar sækja á hana, hún kemst ekki hjá því að horfast í augu við eigin tilfinningar og gerðir.
Svikarinn er saga um unga konu sem missir allt og tekst á við að byggja líf sitt upp að nýju. Lygi og svik hafa hafa mótað líf hennar. Hverjum getur hún treyst? Getur hún elskað og eignast vini eftir allt sem á undan er gengið í lífi hennar?