Hverafugl er ný sumartónlistarhátíð í Hveragerði sem fer fram um næstu helgi, dagana 26. til 28. júní. Hátíðin leggur áherslu á samtímatónlist en er um leið lifandi vettvangur þar sem mismunandi tónlistarstefnur og listform mætast.
Listrænt teymi Hverafugls skipa Halldór Smárason, Ingibjörg Ýr Skarphéðinsdóttir og Lilja María Ásmundsdóttir. Sunnlenska.is hitti þau við sundlaugina í Laugaskarði, en þar verða haldnir tónleikar á sunnudaginn.
Gaman að snúa þessu á hvolf
„Okkar uppskeruhátíð er Myrkir músíkdagar, sem eru alltaf í Reykjavík í lok janúar. Hátíðin sem hér er framundan spratt upp úr þeirri pælingu hvernig svipuð hátíð myndi líta út ef hún væri haldin að sumri til, á bjartasta tíma ársins. Það var kveikjan að þessu,“ segir Ingibjörg.
„Myrkir músíkdagar er þessi stóra hátíð sem flest tónskáld semja fyrir. Það er svo gaman að snúa þessu á hvolf og fara úr frostinu og myrkrinu yfir í virknina í jörðinni og gróðurinn og gróskuna og hlýjuna – og hvar annarsstaðar er það betra en í Hveragerði,“ segir Halldór, sem búsettur er í Hveragerði. „Ég er búinn að búa hér í átta ár og elska Hveragerði. Ég hef verið að vinna að minni list hérna og mér finnst æðislegt að geta gefið til baka til samfélagsins og boðið upp á svona hátíð.“
Samheldni í samfélaginu
Ingibjörg bætir við að það sé skemmtilegt að vera úti á landi og augljóst að íbúum Hveragerði renni blóðið til skyldunnar að standa undir nafni sem menningabær.
„Það er mikil samheldni hér í samfélaginu og gaman hvað allir eru til í þetta, það eru allir tilbúnir að hjálpa okkur og fólk virðist vera spennt fyrir þessu. Það hefur alltaf verið mikil gróska í listum í Hveragerði og eftir að þessi hugmynd kviknaði hjá okkur Lilju þá höfðum við samband við Halldór og einhvern veginn lá það beint við að framkvæma þetta hér.“
Samtal milli tónlistarstefna
Halldór segir undirbúninginn hafa gengið vel og gestir hátíðarinnar eigi von á fjölbreyttri dagskrá, þar sem ólíkar stefnur mætast og nýjar hugmyndir hljóma.
„Við erum þrjú tónskáld sem erum vön að vinna sjálfstætt og við erum að gera svona í fyrsta skiptið, þannig að þetta hefur verið mikill lærdómur fyrir okkur. Það er búið að vera æðislega gaman að setja saman eitthvað sem við fílum og það sem okkur finnst mikilvægast í dagskránni er þetta samtal sem er á milli listgreina og tónlistarstefna. Þó að við séum að fást mest við nútímatónlist og klassíska músík þá erum við líka að vinna mikið með fólki sem er héðan úr Hveragerði, bæði býr hérna og á rætur sínar að rekja hingað. Við vildum ekki koma hingað með tónlist að utan, við vildum sjá hvað við gætum gert með þeim efnivið sem er til staðar hér enda af nógu að taka.“
Lilja bætir við að einnig verði unnið með þemu sem tengjast svæðinu. „Það verða tónleikar um allan bæ, í kirkjunni, listasafninu og grunnskólanum svo eitthvað sé nefnt. Og hér í Laugaskarði verða meðal annars tónleikar þar sem verið að verið er að vinna með vatn, hveri og sundlaugarmenningu. Það er fjölbreytt helgi framundan og við erum að vona að það myndist sú stemning að fólk komi hingað og taki helgina í Hveragerði.“
En verður Hverafugl árleg hátíð héðan í frá?
„Það er draumurinn. Núna þegar nær dregur erum við enn að fá nýjar hugmyndir, þannig að það er komið hugmyndaskjal fyrir næsta ár, eða næstu ár. Við erum búin að fá svo rosalega margar hugmyndir og það er kannski erfiðast í þessu, að geta ekki framkvæmt allt sem okkur langar,“ segja listrænu stjórnendurnir að lokum.
Hverafuglar syngja á setningarathöfninni
Setning hátíðarinnar fer fram í Blómaborg síðdegis á föstudag þar sem m.a. kórinn Hverafuglar kemur fram. Fyrsta kvöldið verða tónleikar í Grunnskólanum í Hveragerði þar sem koma fram CAPUT undir stjórn Guðna Franzsonar og einsöngvarinn Svanlaug Jóhannsdóttir. Þau flytja stórvirkið Stokkseyri eftir Hvergerðinginn Hróðmar Inga Sigurbjörnsson en verkið var samið við ljóð Ísaks Harðarsonar. Á tónleikunum munu einnig hljóma verk eftir nemendur Hróðmars, þ.m.t. verk eftir Báru Gísladóttur, Gísla Magnússon, Herdísi Stefánsdóttur og Snorra Hallgrímsson.
Pétur Nói og Jónas mætast í kirkjunni
Morguninn eftir verður haldið í Hveragerðiskirkju þar sem Pétur Nói Stefánsson, Jónas Sigurðsson og Halldór Smárason bjóða upp á morgunflæði á tónleikunum Alþýðan og orgelið. Seinna um daginn má upplifa ljóðagjörning hjá árbakkanum við Varmá hjá Þetta líður hjá steininum. Þar munu Björg Brjánsdóttir flautuleikari og Þórgunnur Anna Örnólfsdóttir söngkona spinna út frá ljóðum Elísabetar Jökulsdóttur. Hljóðinnsetning eftir Ingibjörgu Ýri mun opna í Bananahúsi Garðyrkjuskólans á Reykjum og Njörður Sigurðsson mun leiða gesti hátíðarinnar í sögugöngu um Hveragerði. Dagurinn mun síðan enda á tónverkinu áttir eftir Lilju Maríu í flutningi Heiðu Árnadóttur.
Melchior bindur lokahnútinn
Lokadagurinn hefst á tónleikum í Sundlauginni Laugaskarði þar sem Strokkvartettinn Siggi mun flytja verk innblásin af vatni, sundmenningu og hverum. Á dagskránni verða verk eftir Ellis Ludwig-Leone, Halldór Smárason og Unu Sveinbjarnardóttur. Því næst mun KIMI Ensemble flytja ný verk eftir tónsmíðanemendur Listaháskóla Íslands í Listasafni Árnesinga. Eftir ferðalag um mismunandi stíla og listform bindur hin sögufræga kammerpopphljómsveit Melchior endahnút á hátíðina með miklum tónlistarbræðingi. Tónleikarnir kallast á við opnunartónleikana með Hvergerðinginn Hróðmar Inga Sigurbjörnsson í broddi fylkingar.
Hverafugl er styrkt af Tónlistarsjóði, Uppbyggingarsjóði Suðurlands, Hveragerðisbæ og Hótel Örk.
