Líkt og í fyrrasumar mun skólasafn Sunnulækjarskóla á Selfossi efna til lestrarátaks í sumarfríinu.
Markmið sumarlestursins er að viðhalda lestrarhæfni nemenda og örva lestrarvenjur þeirra.
Hrönn Sigurðardóttir, safnstjóri Sunnulækjarskóla, segir að stuðla þurfi með öllum ráðum að yndislestri barna og auka áhuga þeirra á lestri sér til skemmtunar því hætta er á að lestrarfærnin dali ef hún er ekki þjálfuð yfir sumartímann.
„Átakið gengur út á að allir nemendur sem lesa að minnsta kosti eina bók í sumarfríinu skili inn sumarlestrarmiða á bókasafnið í upphafi haustannar. Úr þessum miðum verða svo dregnir vinningshafar. Foreldrar og forráðamenn eru hvattir til að styðja við átakið heimavið, með virkri hlustun, enda er þróun læsis barna langtímaferli og góður lesskilningur undirstaða námsárangurs hvers og eins,“ segir Hrönn.
Bókakaffið, Bókaútgáfan Sæmundur, Krisp restaurant, Mjólkursamsalan, Pylsuvagninn og Skalli Selfossi hafa lestrarátakinu lið með því að leggja til vinninga og eru þeim færðar bestu þakkir fyrir.