Næstkomandi sunnudag verður málþing í Þórbergssetri á Hala í Suðursveit þar sem fagnað er stórvirki um sögu þeirra Halldóru Stefánsdóttur og Eymundar Jónssonar sem bjuggu í Dilksnesi í Nesjum á síðari hluta 19. aldar. Verkið er unnið og gefið út að tilstuðlan Þórbergsseturs. Höfundur er Gísli Sverrir Árnason og telur verkið fjögur bindi eða rétt um 1800 blaðsíður.
Á málþinginu sem hefst kl. 13:00 sunnudaginn 12. október kynnir höfundur verk sitt auk þess sem aðilar útgáfunnar og afkomendur taka til máls. Áskrifendur og aðrir kaupendur geta nálgast eintök verksins á málþinginu og í Bókakaffinu á Selfossi og í Reykjavík, í Þórbergssetri og hjá Menningarmiðstöð Hornafjarðar á Höfn.
Bindin fjögur um Eymund og Halldóru spanna tímabilið frá síðustu árum 18. aldar og fram um miðja 20. öld. Þær segja ekki aðeins sögu fjölskyldunnar heldur um leið héraðssögu Horna-fjarðar á 19. öld, sögu vesturheimsferða Íslendinga og þjóðarsögu fátækrar bændaþjóðar.
Hér segir frá ungum fátækum Öræfingi Meyvanti Jónssyni frá Hofi. Með hjálp unnustunnar Halldóru Stefánsdóttur frá Árnanesi brýst hann til nokkurra virðinga. Hann er bóndi, læknir, smiður og sveitarskáld í Dilksnesi og saman eignast þau hjónin sextán börn.
Árið 1879 auglýsir Meyvant í Þjóðólfi að hann hafi breytt nafni sínu og heiti hér eftir Eymundur. Halldóra kona hans er ósátt við þessa fyrirtekt manns síns og kallar hann áfram Meyvant.
Þrátt fyrir nokkrar mannvirðingar og að þau hjón tilheyra efra lagi bændasamfélagsins þá eru efnin lítil og lífsbaráttan hörð. Sambland af frelsisþrá og erfiðleikar í bláfátæku landi hrekja því fjölskylduna til Vesturheims árið 1902 en þar hefur nánasta ættfólk Halldóru þegar komið sér fyrir. Fimm árum síðar koma þau aftur heim í Hornafjörð.
Auk sögunnar er skáldskapur sveitarskáldsins Eymundar birtur í lokabindi verksins. Bækurnar eru ríkulega myndskreyttar og þeim fylgja ítarlegar skrár og vísanir í frekari heimildir.
—
Kynning á Sögu Eymundar og Halldóru verður einnig í Bókakaffinu í Ármúla 42 í Reykjavík fimmtudaginn 16. október kl. 17-19. Léttar veitingar. Áskrifendur geta vitjað um bækur sínar.