Karen Ragnarsdóttir, verslunarstjóri í Lindex, Ginu Tricot og Emil&Línu á Selfossi, svaraði nokkrum áramótaspurningum fyrir sunnlenska.is
Hvernig var árið 2025 hjá þér? Árið var ótrúlega skemmtilegt og gefandi en á sama tíma mjög krefjandi og erfitt. Fullt af boltum á lofti, tók við Ginu Tricot og Emil&Línu á Selfossi þegar við opnuðum í maí á þessu ári, samhliða því að vera ennþá að sjá um Lindex. Það hefur verið skemmtileg viðbót og tilbreyting. Tók þátt í þó nokkrum opnunum nýrra verslana innan fyrirtækisins og fleiri skemmtilegum verkefnum. Kláraði loksins BS gráðuna í viðskiptafræði en fannst það ekki nóg og ákvað að skrá mig í meistaranám strax eftir það. Svo ferðaðist ég meira en vanalega með fjölskyldunni og vinum bæði innanlands og erlendis, það er alltaf extra gaman.
Hvað stóð upp úr á árinu? Samvera með fjölskyldunni og vinum stendur alltaf upp úr og að skapa nýjar minningar með þeim. Og svo þetta klassíska; sjá strákana mína tvo vaxa, dafna og uppgötva heiminn.
Hvaða lag hlustaðir þú oftast á? Fyrir utan Vögguvísur með Hafdísi Huld var það Ordinary með Alex Warren.
Hvað finnst þér ómissandi að gera alltaf á gamlársdag/kvöld? Hér áður fyrr fannst mér ómissandi að fara á Hrísholtið til ömmu og afa eftir mat og eyða kvöldinu með móðurfjölskyldunni. Við spilum mikið og áramótin eru engin undantekning. Einu sinni vorum ég, amma og Eyrún móðursystir mín stoppaðar af um morguninn á nýársdag, þá alveg búnar að spila yfir okkur allt kvöldið og nóttina. Ætli ég sakni ekki smá þeirrar hefðar. Í dag er kannski ekkert sérstakt sem er ómissandi, bara ótrúleg forréttindi að fá að upplifa áramótin í gegnum strákana mína.
Hvað ætlarðu að gera um áramótin? Fjölskyldan hjá sambýlismanni mínum eyðir áramótunum saman í Þingborg og við látum okkur ekki vanta þangað. Þetta er stór fjölskylda, amma hans á tíu börn og hún ásamt þeim og afkomendum þeirra eru þarna öll saman komin, borða góðan mat og hafa gaman. Svo er rölt á brennu á Litlu Reykjum, horft á Skaupið og sprengt upp. Ég hef reyndar ekki ennþá farið lengra en matur og gaman, þar sem ég fer með yngsta strákinn heim. Kannski kemst ég lengra þetta árið. Svo er það bara notalegt fram að miðnætti og upp í rúm.
Hvað er í matinn á gamlárskvöld? Léttreyktur hátíðarkjúklingur klikkar ekki, með sætkartöflumús, heimagerðum rauðrófum, gulrótum og piparostasósu. Svo er það marmaraostakakan hennar mömmu í eftirrétt.
Strengir þú eitthvað áramótaheit? Nei, ég hef nú ekki lagt það í vana. Hins vegar hugleiði ég hvað ég vil fá út úr nýju ári, hverju ég vil áorka og hvernig manneskja ég vil vera. Hvort sem það næst eða ekki.
Hvernig leggst nýja árið í þig? Það leggst mjög vel í mig, ég finn á mér að það verður einhvað við það ár. Ég veit ekki ennþá hvað það er eða í hvaða mynd það birtist, en það eru einhverjar skemmtilegar breytingar sem munu fylgja því ári.