Sólstöðuhátíðin Árbakkinn verður haldin næstkomandi laugardag á fjölskyldu- og útivistarsvæði í Nesi á Hellu frá klukkan 18-21.
Á hátíðinni mun tónlistarfólk frá Hellu, Hvolsvelli og nágrenni koma fram. Ókeypis aðgangur er á hátíðina og er hún ætluð allri fjölskyldunni
„Ég var að rúnta með yngsta strákinn minn um Hellu í lok febrúar. Þegar ég keyrði framhjá útivistarsvæðinu í Nesi þá hugsaði ég með mér að þarna gæti verið gaman að halda tónleika að sumri til,“ segir Bjarki Eiríksson, skipuleggjandi hátíðarinnar, í samtali við sunnlenska.is.
„Hugmyndin lét mig ekki í friði og eftir að hafa borið hana undir nokkra vini mína ákvað ég að sumarsólstöður yrðu fyrir valinu. Ég gekk þá skrefinu lengra og byrjaði að sækja leyfi til sveitarstjórnar og um styrki í samfélagssjóði og til fyrirtækja á svæðinu. Allir tóku vel í uppátækið og hér erum við í dag.“
„Þetta er í fyrsta skipti sem við höldum upp á sólstöður með þessu móti en miðað við hve vel við skemmtum okkur á æfingum er vonandi að þetta verði að árlegum viðburði.“
Hæfileikafólk í Rangárvallasýslu
Í Rangárvallasýslu býr margt hæfileikaríkt fólk og eiga þeir listamenn sem koma fram á hátíðinni allir það sameiginlegt að vera úr sýslunni.
„Listamennirnir eru flestir búsett á Hellu, Hvolsvelli og nærsveitum eða eiga tengingu við svæðið. Við erum átta talsins sem komum fram ásamt gestasöngvurum og hljómsveit, Sólstöðubandinu, sem spilar undir,“ segir Bjarki.
Umræddir listamenn eru Brynhildur Sighvatsdóttir, Dana Ýr Antonsdóttir, Finnur Bjarki Tryggvason, Fríða Hansen, Glódís Margrét Guðmundsdóttir, Kristinn Ingi Austmar, Stefán Orri Gíslason, auk Bjarka.
Góð stemning fyrir hátíðinni
Sem fyrr segir er sólstöðuhátíðin fyrir alla fjölskylduna. „Við hefjum leik um sexleytið á laugardaginn sem hentar barnafólki. Léttleikandi popp- og rokktónlist í órafmögnuðum stíl verður í fyrirrúmi. Við munum bjóða upp á allskonar lög sem skapa sumarlega og létta stemningu.“
„Stemningin fyrir hátíðinni er góð. Við finnum fyrir miklum meðbyr og fólk á svæðinu er áhugasamt um hátíðina og fagnar frumkvæðinu.“
„Ég vil þakka bakhjörlum hátíðarinnar fyrir að hjálpa okkur að gera þetta að veruleika. Svo hvetjum við að sjálfsögðu öll sem eiga heimangengt að mæta á laugardaginn og fagna sólstöðum með söng, gleði og samneyti við vini og fjölskyldu,“ segir Bjarki að lokum.