Goðsagnakennd sveitaballastemning verður endurvakin í kvöldvökuformi þegar Skítamóral býður til „Syngja með kvöldvöku“ í Aratungu laugardagskvöldið 1. ágúst.
Aratunga er eitt þeirra húsa sem skipar sérstakan sess í skemmtanasögu uppsveitanna. Nú gefst tækifæri til að upplifa þá stemningu á ný en markmiðið er að endurvekja andrúmsloftið sem margir muna úr Aratungu, Árnesi, Borg í Grímsnesi og Njálsbúð. Þetta verða hvorki hefðbundnir tónleikar né sveitaball fram á nótt, heldur kvöld þar sem fólk kemur saman, syngur með lögunum sem það kann utan að og nýtur góðrar samveru.
„Okkur hlakkar gríðarlega til. Það er þónokkuð síðan við spiluðum í Aratungu og við vitum að um allar uppsveitirnar verður fullt af fólki um Verslunarmannahelgina sem langar að lyfta sér aðeins á kreik án þess að vaka fram undir morgun. Þess vegna finnst okkur þessi kvöldvökuhugmynd passa einstaklega vel,“ segir Addi Fannar, gítarleikari Skítamórals í samtali við sunnlenska.is.
Addi segir kvöldið einnig hafa sérstaka persónulega þýðingu. „Þetta er mér afskaplega kært því ég á sjálfur ættir að rekja til Reykholts í Biskupstungum og á þar fjölda ættingja og vina. Það verður því sérstaklega gaman að koma aftur í Aratungu og fylla húsið af söng og góðri stemningu.“
Kvöldvakan hefst klukkan 21:00 en húsið opnar klukkan 20:00. Aðeins verða 250 sæti í boði og verður setið við borð á meðan Skítamóral flytur öll lögin sem hafa fylgt landsmönnum í gegnum árin.
„Við erum ekki að reyna að endurskapa ballið sjálft heldur tilfinninguna. Stemninguna þegar allt húsið söng með. Þetta verður sannkölluð sveitaballastemning í kvöldvökuformi þar sem allir geta notið kvöldsins, sungið með og verið komnir heim á skynsamlegum tíma.“
Miðasala hefst mánudaginn 6. júlí klukkan 12:00 á tix.is. Reiknað er með miklum áhuga enda eru aðeins 250 miðar í boði á þessa einstöku kvöldstund í einu þekktasta félagsheimili landsins.