Eftir vel heppnaða tónleika fyrir fullu húsi á Höfn í Hornafirði í gær heldur Sinfóníuhljómsveit Íslands áfram ferð sinni um Suðurland. Í kvöld kl. 19 eru tónleikar í íþróttamiðstöðinni í Vík í Mýrdal og á föstudagskvöld í íþróttahúsinu Iðu á Selfossi.
Um tónsprotann heldur Eva Ollikainen, aðalhljómsveitarstjóri Sinfóníuhljómsveitar Íslands og með í för er Jóhann Kristinsson barítónsöngvari, sem er einn af okkar fremstu söngvurum. Fjöldi kóra á Suðurlandi tekur einnig þátt í flutningnum.
Það er Sinfóníuhljómsveit Íslands mikið kappsmál að allir landsmenn fái notið tónleika hennar og á hún reglulega stefnumót við áheyrendur víða um landið sem eru ævinlega skemmtileg og gefandi. Á efnisskránni eru verk eftir tónskáld á borð við Verdi, Beethoven, Sigvalda Kaldalóns og Atla Heimi Sveinsson.
Aðgangur er ókeypis og eru öll hjartanlega velkomin!