Hljómsveitin Greifarnir hafa verið í tónleikaferð í sumar í tilefni af 40 ára afmæli sveitarinnar. Yfirskrift tónleikaferðarinnar er „Síðasta sveitaballið“ og þeir verða á Borg í Grímsnesi næstkomandi föstudagskvöld.
„Túrinn fór af stað núna í júní og viðtökurnar hafa verið frábærar. Fólk hefur tekið vel í hugmyndina um að rifja upp gömlu sveitaballastemninguna, syngja með og skemmta sér saman eins og áður fyrr,“ segir Viddi, söngvari Greifanna í samtali við sunnlenska.is.
„Við hlökkum mikið til að hitta Sunnlendinga. Okkur finnst líka skemmtilegt að Borg sé hluti af ferðalaginu þar sem eftir því sem okkur er best kunnugt hefur ekki verið haldinn sambærilegur sveitaballaviðburður í áratugi, mögulega á þessari öld,“ bætir Viddi við.
Saga Greifanna hefst árið 1983 á Húsavík þegar Viddi, Bjössi og Jón Ingi byrjuðu að spila saman undir nafninu Special Treatment. Fljótlega bættist Gunni trommari í hópinn og árið 1985 náði sveitin öðru sæti í Músíktilraunum.
Það sem gerir sögu sveitarinnar enn sérstæðari er að þessir fjórir upprunalegu meðlimir — Viddi, Bjössi, Jón Ingi og Gunni — eru enn saman í hljómsveitinni í dag. Það er afar sjaldgæft í íslenskri tónlistarsögu að sami kjarninn haldist saman í fjóra áratugi. Með þeim í bandinu í dag eru Ingó sem bættist við árið 1997 og Kiddi sem kom inn árið 2022.
Árið 1986 var nafninu breytt í Greifarnir, Felix gekk til liðs við bandið og allt small. Greifarnir unnu Músíktilraunir og „the rest is history“. Allir þekkja lög eins og Útihátíð, Ég vil fá hana strax, Frystikistulagið og Skiptir engu máli. Í sumar sendir sveitin einnig frá sér nýtt lag, Endalaust sumar, sem fangar stemninguna, nostalgíuna og gleðina sem hefur fylgt Greifunum í gegnum árin.
Þessi lög og mörg fleiri munu eflaust hljóma á Borg á föstudagskvöldið en ballið byrjar klukkan 22 og er búið klukkan 1. Síðan heldur túrinn áfram, norður í Skagafjörð, til Keflavíkur og á Bræðsluna, áður en Greifarnir mæta aftur á Suðurlandið, í Aratungu 15. ágúst.
