Selfossbíó og Rauða húsið

Menningarmánuðurinn október í Árborg er genginn í garð og næsti viðburður fer fram í kvöld fimmtudaginn 16. október kl.20:30 á Hótel Selfossi.

Þá verður minnst sögu Selfossbíós með fjölbreyttum hætti. Farið verður í gegnum söguna í máli og myndum en Marteinn Sigurgeirsson hefur unnið mikið myndefni um sögu Selfossbíós fyrir kvöldið.

Tónlistin verður líka í brennidepli en Ragnar Bjarnason eða Raggi Bjarna og Þorgeir Ástvaldsson mæta og skemmta gestum ásamt Stefáni Jónssyni í Lúdó. Það má því búast við góðri stemmningu í húsinu en Ragnar og Stefán spiluðu báðir mikið í Selfossbíói á sínum tíma. Kynnir kvöldsins er Björn Gíslason en húsið opnar kl. 20:00.

Laugardaginn 18. október verður síðan menningarkvöld í Rauða húsinu á Eyrarbakka en þá verður farið yfir sögu hússins Miklagarðs sem hýsir veitingastaðinn Rauða húsið í dag og áhrif þess á Eyrarbakka og mun Magnús Karel Hannesson fara yfir söguna í máli og myndum. Örlygur Benediktsson ásamt bandi spila síðan fjölbreytta tónlist fyrir gesti en kvöldið verður í októberfestivalstemmningu.

Allir eru velkomnir á kvöldin en það er frítt inn í boði Sveitarfélagsins Árborgar.