Síðastliðinn þriðjudag undirrituðu Samtök sunnlenskra sveitarfélaga og Sinfóníuhljómsveit Suðurlands samning um áhersluverkefni. SASS mun styrkja hljómsveitina um tvær milljónir króna á þessu ári til að halda skólatónleika og kynna klassíska tónlist fyrir nemendum í grunnskólum á Suðurlandi.
Með stuðningi sínum vill SASS auðga menningarlíf á Suðurlandi og skjóta frekari rótum undir starfsumhverfi klassískra tónlistarmanna á Suðurlandi.
Sinfóníuhljómsveit Suðurlands var stofnuð haustið 2020, hljómsveitarstjóri sveitarinnar er Guðmundur Óli Gunnarsson og Margrét Blöndal er framkvæmdarstjóri. Í frétt frá SASS segir að þetta sé mikilvægt verkefni fyrir tónlistarskólana á svæðinu, og mun tilkoma hljómsveitarinnar koma til með að breyta menningarlífi á Suðurlandi.
Sumarið 2021 tók Sinfóníuhljómsveit Suðurlands þátt í Oddahátíð, auk þess sem hún hélt tólf skólatónleika, sem voru meðal annars fjármagnaðir af SASS.