Jasstónlistarkonan Sara Mjöll Magnúsdóttir frá Hellu var heiðruð á Íslensku tónlistarverðlaununum sem afhent voru í gærkvöldi. Sara Mjöll var valin bjartasta vonin í íslenskri tónlist.
Sara Mjöll steig fram sem hljómsveitarstjóri árið 2025 með útgáfu fyrstu plötu sinnar, A Place to Bloom, og fylgdi henni eftir með útgáfutónleikum á Jazzhátíð í Reykjavík. Hún flutti eigið efni með Stórsveit Reykjavíkur, kom fram með eigin hljómsveitum og er eftirsóttur meðleikari í fjölbreyttum verkefnum bæði sem Hammond-orgelleikari og píanóleikari.
Árið 2025 markaði tímamót fyrir Söru, þar sem hún fór að móta listræna rödd og finna sér farveg innan djasssenunnar. Að mati dómnefndar undirstrika metnaður hennar, frumkvæði og framhaldsnám í New York að hér er á ferðinni tónlistarkona sem á eftir að láta að sér kveða á komandi árum.
Fleiri Sunnlendingar hlutu verðlaun í gærkvöldi en Þorlákshafnarbúinn Tómas Jónsson kom heim með tvær styttur í fanginu. Tómas var tilnefndur í fjórum flokkum en hann hlaut verðlaun sem flytjandi ársins í djasstónlist og þá fengu Tómas og félagar hans verðlaun fyrir tónlistargrafík ársins fyrir hljómplötuna Best á flest: Sounds of America. Tómas vann að verkinu ásamt þeim Magnúsi Trygvasyni Eliassen, Davíð Arnar Baldurssyni og Ragnari Þórhallssyni.
