Tuttugu og sex listnámsnemendur og kennarar frá fjórum löndum munu dvela í vinnubúðum á Sólheimum í Grímsnesi 2. – 6. júní til að leggja lokahönd á tveggja ára samstarfsverkefni á sviði list- og verkmenntunar.
Verkefnið gengur undir nafninu TIA (Tradition, Innovation and Assessment in Vocational Art Education and Traning) og er styrkt af Menntaáætlun Evrópusambandsins. Tilgangur þess er að efla samvinnu milli landa í list- og verkgreinum.
Íslensku þátttakendurnir eru nemendur og kennarar í Borgarholtsskóla í Reykjavík en auk þeirra koma þátttakendur frá listaskólum í Eistlandi, Lettlandi og Ítalíu. Verkefnið hófst í Eistlandi og Lettlandi, því næst á Ítalíu og lýkur með vinnubúðunum á Sólheimum.
Sýning á afrakstri þessarar samvinnu verður haldin í Sesseljuhúsi á Sólheimum fimmtudaginn 6. júní nk. frá kl. 17-19. Auk teikninga, ljósmynda, keramik og bókverka verða sýnd stutt myndbrot frá dvöl hópanna í löndunum fjórum.
Aðgangur er ókeypis og allir velkomnir.