Upplit stendur fyrir safnarasýningu í Félagsheimilinu Brautarholti á Skeiðum laugardaginn 3. nóvember og er sýningin framlag Upplits til Safnahelgar á Suðurlandi.
Þetta er í annað sinn sem Upplit efnir til safnarasýningar, en sú fyrsta var haldin í Félagsheimilinu á Flúðum í fyrra.
Upplit biðlar nú sem fyrr til safnara í uppsveitunum að draga fram úr hirslum sínum gersemarnar sem þeir hafa verið að safna og koma ekki endilega alltaf fyrir margra sjónir. Nú er tækifærið til að dusta rykið af þessum einkasöfnum og hefja þau til vegs og virðingar með því að sýna þau öðrum.
Þá er átt við stór og smá söfn sem leynast víða á heimilum; frímerki, spil, merki, uglur, kindur, húfur, penna, límmiða, glansmyndir, servíettur, eldspýtustokka, þjóðbúningadúkkur, póstkort, skó eða hvaðeina sem sumir hafa gaman af að safna og aðrir hafa gaman af að skoða.
Þeir sem hafa áhuga á að vera með í sýningunni eru hvattir til hafa samband við sýningarstjórana Skúla Sæland (663 9010 / skulisael@gmail.com) eða Önnu Kristjönu Ásmundsdóttur (896 6430 / anna@fludaskoli.is) og tryggja sér borð.