Í dag mun harmonikuleikarinn Jón Þorsteinn Reynisson leggja upp í hringferð, og halda tónleika á alls sautján stöðum á ferð sinni.
Þessi tónleikaferð er farin að því tilefni að í haust mun Jón taka næsta skref í tónlistarnáminu og halda til Danmerkur þar sem að hann hefur framhaldsnám á harmoniku við Konunglega Tónlistarháskólann í Kaupmannahöfn. Þar mun hann verða nemandi Norðmannsins Geirs Draugsvoll, sem er Íslendingum að góðu kunnur fyrir snilldarlegan harmonikuleik.
Efnisskrá Jóns á tónleikunum er fjölbreytt og skemmtileg. Hann mun leika þekkt verk eftir tónskáld eins og Mozart, Sibelius, Vivaldi og Rachmaninov. Á tónleikunum mun hann því leitast við að sýna sem mest af því sem harmonikan sem hljóðfæri hefur upp á að bjóða, og hversu fjölhæf hún er.
Jón spilar á þremur stöðum á Suðurlandi, í Víkurkirkju í Mýrdal kl. 20:30 þriðjudaginn 8. maí, í safnaðarheimilinu á Hellu miðvikudaginn 9. maí kl. 20 og fimmtudaginn 10. maí verður hann í Skálholtsdómkirkju kl. 20:30.
Jón hefur komið upp vefsíðu sem heldur utan um allar helstu upplýsingarnar um tónleikaferðina.
Slóðin á síðuna er www.jonthorsteinn.com.