Sæmundur gefur út verðlaunabók

Verðlaunabókin Spámennirnir í Botnleysufirði eftir Kim Leine er komin út í íslenskri þýðingu Jóns Halls Stefánssonar. Útgefandi er Bókaútgáfan Sæmundur á Selfossi.

Bókin sem heitir á frummálinu Profeterne i Evighedsfjorden hlaut Bókmenntaverðlaun Norðurlandaráðs árið 2012 og hefur síðan farið sigurför um bókmenntaheiminn og verið þýdd á fjölda mála.

Hér segir frá 18. aldar nýlendusamfélagi Dana í smábænum Sykurtoppi á vesturströnd Grænlands.

Kristniboðinn Morten Falck er illa farinn á sál og líkama og efast um sjálfan sig og köllun sína. Hann vill umfram allt komast burt en óttast að verða sendur heim í hlekkjum. Grænlenskur aðstoðarprestur hans tekst á við sorg sína og reiði. Kaupmaðurinn hefur tögl og hagldir í nýlendustöðinni en undir kraumar óvild milli heimamanna og nýlenduherranna.

Inni í Botnleysufirði hafa kristnir Grænlendingar sagt sig úr lögum við Danaveldi undir forystu spámannanna Habakúks og Maríu Magdalenu. Þau hafa fundið sinn eigin sannleika og láta sig dreyma um frelsi, jafnrétti og bræðralag, þótt langt sé til byltingarborgarinnar Parísar.

Skáldsagan Spámennirnir í Botnleysufirði er lauslega byggð á sönnum atburðum í dansk-norska konungsveldinu í lok átjándu aldar. Söguefnið spannar mannlíf höfuðborgarinnar eins og það blasir við norskum guðfræðinema. Nýlendubyggðir Grænlands með sínum öfgum og endemum, sjómannslíf á langferðum, sveitir Noregs og logandi stræti brunans mikla í Kaupmannahöfn árið 1795.

Höfundurinn Kim Leine og þýðandinn Jón Hallur verða við útgáfufögnuð bókarinnar í verslun Eymundsson við Skólavörðustíg þriðudaginn 27. október klukkan 17-19. Kaffi og konfekt í boði útgefanda. Allir velkomnir.

Kim Leine er danskur rithöfundur, fæddur 1961. Hann er hjúkrunarfræðingur að mennt og starfaði sem slíkur á Grænlandi árum saman. Fyrsta skáldsaga Leines, Kalak, kom út árið 2007. Í kjölfarið fylgdu Valdemarsdag, 2008, og Tunu, 2009. Spámennirnir í Botnleysufirði litu svo dagsins ljós árið 2012 og í ár kom út bókin Afgrunden.