Rut og Björn á Kvoslæk hlutu Menningarverðlaun Suðurlands

Eva Björk Harðardóttir afhendir Rut Ingólfsdóttur og Birni Bjarnasyni viðurkenningu fyrir menningarstarf að Kvoslæk. Ljósmynd/Gunnar Páll Pálsson

Á ársþingi Samtaka sunnlenskra sveitarfélaga sem haldið var í fjarfundi dagana 29. og 30. október voru Rut Ingólfsdóttur og Birni Bjarnasyni að Kvoslæk í Fljótshlíð veitt Menningarverðlaun Suðurlands 2020.

Verðlaunin eru samfélags- og hvatningarverðlaun á sviði menningar á Suðurlandi en þetta er í annað sinn sem þau eru veitt. Alls bárust fimmtán tilefningar um tólf verkefni.

Í fréttatilkynningu frá SASS segir að samkeppni um verðlaun af þessu tagi sé mikil enda menningarlíf á Suðurlandi blómlegt og valið var því erfitt.

Rut og Björn hafa staðið fyrir menningarviðburðum á borð við tónleika og fyrirlestrarraðir frá árinu 2011. Tónleikarnir eru klassísks eðlis og hafa Rut og Björn fengið til liðs við sig fólk bæði úr heimahéraði sem og af höfuðborgarsvæðinu. Rut hefur auk þess átt í samstarfi við kirkjukóra frá Breiðabólstað og frá Odda og Þykkvabæ og hélt hópurinn tónleika í þrennum kirkjum á Suðurlandi. Hafa Rut og Björn lagt sig fram um að efla tónlistarstarf í sveitarfélaginu og hafa t.a.m. boðið nemendum Tónlistarskóla Rangæinga á tónleika, sem haldnir hafa verið í Hlöðunni að Kvoslæk, til að hvetja þau til frekara tónlistarnáms.

Í rökstuðningi dómnefndar segir að hjónin á Kvoslæk hafi með drifkrafti sínum og eljusemi vakið verðskuldaða athygli á metnaðarfullum menningarviðburðum og hafi komið með ferskan innblástur í menningarlífið á staðnum. Menningarstarfsemi þeirra hafi vakið eftirtekt fyrir fjölbreytni og gefið jákvæða mynd af sunnlenskri menningu. Viðburðir þeirra hafi stuðlað að þátttöku íbúa á Suðurlandi og um leið laðað gesti að landshlutanum. Fyrirlestrarnir hafi í flestum tilvikum fjallað um efni sem tengjast Suðurlandi og þannig hafi þau einnig vakið athygli á menningararfi Sunnlendinga.