Rúi og Stúi á Selfossi

Leikfélag Selfoss æfir um þessar mundir barna- og fjölskylduleikritið Rúi og Stúi eftir þá Skúla R. Hilmarsson og Örn Alexandersson.

Um er að ræða æsifjörugt verk þar sem fara saman spenna, gleði, grín og söngur. Leikstjóri er F. Elli Hafliðason og stýrir hann kraftmiklum hópi leikara.

Með hlutverk Rúa og Stúa fara Rakel Stefánsdóttir og Álfrún Björt Agnarsdóttir en þær stöllur slógu einmitt í gegn með eftirminnilegum hætti í barnaleikritinu Sjóræningjaprinsessan sem LS setti upp 2009.

Frumsýnt verður föstudaginn 21. október og er fólki bent á að tryggja sér miða, í síma 482-2787, sem fyrst því sýningarfjöldi verður takmarkaður.