Samzel, árleg söngkeppni í félagsmiðstöðinni Zelsíuz á Selfossi, fór fram síðastliðið miðvikudagskvöld á Sviðinu. Sigurvegarar keppninnar urðu þau Rannveig Kjartansdóttir og Örn Hreinsson sem fluttu Billy Joel-lagið Vienna, þar sem Örn spilaði undir á píanó.
Níu fjölbreytt atriði tóku þátt í keppninni en kvöldið einkenndist af hugrekki þátttakenda sem stigu út fyrir þægindarammann og létu ljós sitt skína. Áhorfendasalurinn á Sviðinu var þétt setinn og stemningin mikil.
Keppnin var jöfn og spennandi en að lokum stóðu þau Rannveig og Örn uppi sem sigurvegarar kvöldsins. Hugrún Hadda hreppti annað sætið og Hrefna Rós það þriðja. Þá hlutu Sveinn Atli og Hafberg sérstök verðlaun fyrir skemmtilegasta atriði kvöldsins en þeir fluttu frumsamið lag.
Rannveig og Örn munu keppa fyrir hönd Zelsíuz í undankeppni söngkeppni Samfés á Suðurlandi sem fram fer á Flúðum þann 20. mars, þar sem þau mæta fulltrúum annarra félagsmiðstöðva á svæðinu og keppa um sæti í Söngkeppni Samfés í maí.
„Starfsfólk Zelsíuz er afar stolt af öllum þeim ungmennum sem tóku þátt. Söngkeppnin er dýrmætur vettvangur fyrir ungmenni til að efla sjálfstraust, tjá sköpunargleði og upplifa stuðning jafningja og starfsfólks. Kvöldið sýndi enn og aftur þann mikla hæfileika og kraft sem býr í ungmennahópnum í Árborg,“ segir Guðmunda Bergsdóttir, forstöðumaður frístundahúsa Árborgar.
