Laugardaginn 14. nóvember kl. 16:30 mun dúóið Harp & Arp vera með tónlistarspuna í Bókakaffinu á Selfossi.
Harp & Arp er hugarfóstur hörpuleikarans Katie Buckley og hljóðgervlaleikarans Jesper Pedersen. Saman flytja þau tónlistina á hljóðbreytta hörpu og hljóðgervil. Tónlist Harp & Arp verður til á staðnum, í djúpstæðu samtali milli flytjendanna tveggja. Útkoman er tónlist sem fellur undir ambient-stefnuna, þar sem áhersla er bæði lögð á tónræna byggingu og óhlutbundin ferðalög um heim hljóða og hljóðáferða.
Harp & Arp gaf út stuttskífuna The Shortest Day árið 2021 og vinnur nú að breiðskífu.
Gestir Bókakaffisins eiga von á ljúfri og rafmagnaðri stemningu á þessum tónleikum og aðgangur er ókeypis.