Í tilefni Mánaðar myndlistar og Menningarmánaðar í Árborg forsýnir Guðrún Arndís Tryggvadóttir fjölda splunkunýrra „Ímyndana*“ á Pop-up sýningu sem haldin verður í risastóru iðnaðarhúsnæði að Eyravegi 65 á Selfossi um helgina, við hliðina á Nytjamarkaðinum.
Sýningin verður aðeins opin helgina 8. og 9. október frá kl. 11:00 – 18:00.
Guðrún nam við Myndlista- og handíðaskóla Íslands 1974-78, École Nationale Supérieure des Beaux-Arts í París 1978-79 og Akademie der Bildenden Künste í München 1979-83. Hún hefur haldið og tekið þátt í sýningum hér heima, í Evrópu og í Bandaríkjunum og hlotið fjölda viðurkenninga, bæði fyrir myndlist sína og fyrir störf sín á sviði nýsköpunar en hún hefur verið frumkvöðull á ýmsum sviðum; stofnað og rekið útgáfufélag, myndlistarskóla og listræna hönnunarstofu og gallerí sem hún rak í Þýskalandi og hér heima um árabil. Guðrún er einnig frumkvöðull á sviði umhverfismála en hún stofnaði umhverfisfræðsluvefinn Náttúran.is sem hún rak um tíu ára skeið.
Guðrún vinnur aðallega stór verk með olíu á striga en málverk hennar byggja á hugmyndafræðilegum grunni og eru oft mjög persónuleg og tengjast tíma- og efnishugtakinu. Guðrún býr og starfrækir vinnustofu sína á Selfossi.
Nánar á tryggvadottir.com
* Ímyndun – það ferli, sem leiðir til hugmyndar eða skipar hugmyndum í nýtt mynstur/imagination.