Leikfélag Hveragerðis undirbýr nú af kappi uppsetningu á ævintýrasöngleiknum um litlu ævintýragjörnu músina Pílu Pínu.
Hryggjarstykki sýningarinnar eru ljóð eftir Kristján frá Djúpalæk með lögum eftir Heiðdísi Norðfjörð og Ragnhildi Gísladóttur. Kristján er einmitt eitt af Hveragerðisskáldunum og því vel við hæfi að setja upp þessa sýningu og heiðra verk hans á 80 ára afmæli Hveragerðisbæjar.
Leikstjórn annast Gunnar Gunnsteinsson en hann er öllum hnútum kunnugur þegar kemur að uppsetningum barnaleikrita og þetta er þriðja uppsetning hans með Hvergerðingum, en áður leikstýrði hann Benedikt Búálfi og Ávaxtakörfunni við frábærar undirtektir. Öll tónlist hefur verið sett í nýjan búning og ljá nýjar útsetningar verkinu ferskan blæ.
Leikritið um Pílu Pínu skipar stóran sess í hjörtum margra Íslendinga, en saga hennar og ævintýri hafa glatt kynslóðir barna.
Frumsýnt verður í byrjun október og verður miðasala auglýst síðar.