Í tilefni af 80 ára afmæli Hveragerðisbæjar hefur Leikfélag Hveragerðis ákveðið að setja upp í haust ævintýrasöngleikinn um litlu músina Pílu Pínu eftir Kristján frá Djúpalæk með lögum Heiðdísar Norðfjörð. En Kristján bjó í Hveragerði um miðja síðustu öld og var stór hluti af samfélagi skálda og annarra listamanna sem settu svip á hið ört stækkandi þorp.
Gunnar Gunnsteinsson hefur verið ráðinn leikstjóri en þetta er í þriðja sinn sem hann leikstýrir í Hveragerði en áður leikstýrði hann Benedikt Búálfi (2022) og Ávaxtakörfunni (2024) sem báðar slógu í gegn. Nú síðast leikstýrði Gunnar Skilaboðaskjóðunni hjá Leikfélagi Selfoss sem einnig gekk mjög vel.
Undirbúningur er hafinn og um næstu helgi verður samlestur og leiksmiðja 30. og 31. maí kl. 11-15 í leikhúsinu Austurmörk 23 og í kjölfarið verður valið í hlutverk. Æfingar hefjast síðan af krafti í ágúst og stefnt er á frumsýningu í byrjun október. Nánari upplýsingar má finna á Facebook síðu Leikfélags Hveragerðis.
Það er þó ekki það eina sem er á döfinni hjá Leikfélaginu því laugardagskvöldið 30. maí kl 20 er á boðstólnum glæpsamlegt stuttverkakvöld þar sem boðið verður upp á nokkur lauflétt og glæpsamleg stuttverk. Miðaverðið er aðeins 2.000 kr og miðapantanir fara fram á midasala@leikhver.is.