Hollenski gítarleikarinn Paulus Schäfer, sem er í hópi fremstu gypsy jazz gítarleikara í heiminum í dag, kemur fram á tónleikum á Sviðinu á Selfossi fimmtudaginn 1. október kl. 20:00. Honum til halds og trausts verður Tríó Gunnars Hilmarssonar, auk tveggja sunnlenskra gesta.
Schäfer er af Sinti-ættum, en sá þjóðflokkur er þekktur fyrir tónlist sína og hafði mikil áhrif á þróun tónlistar í Evrópu. Lögin voru sjaldnast skrifuð niður heldur lærðust á milli kynslóða, og það gera þau enn í dag. Spuni gegnir lykilhlutverki og í daglegu tali er stefnan kölluð gypsy jazz.
Gunnar Hilmarsson hefur verið leiðandi í gypsy jazz hér á landi undanfarin ár. Hann lauk burtfararprófi frá Tónlistarskóla FÍH árið 2009. Með Gunnari í tríóinu eru Selfyssingurinn Leifur Gunnarsson á kontrabassa og Jóhann Guðmundsson á gítar.
Sérstakir gestir á tónleikunum verða fiðluleikararnir Dan Cassidy og Hugrún Birna Hjaltadóttir. Bandaríski fiðluleikarinn Dan Cassidy hefur búið á Íslandi frá upphafi tíunda áratugarins og er nú búsettur á Selfossi, þar sem hann auðgar menningarlífið sunnlendinga með fallegum fiðluleik sínum. Hugrún hefur vakið athygli fyrir skemmtilega framkomu, en hún stundar nám í fiðluleik við Tónlistarskóla Árnesinga.
Miðasala fer fram á stubb.is.