Um næstu helgi mun listatvíeykið Lemos og Lehmann opna viðburðinn “Finndu þína eigin á” í Tumastaðaskógi. Verkefnið er sett upp í tilefni af sumarsólstöðum og samanstendur af þremur tímabundnum innsetningum sem unnar eru sérstaklega inn í umhverfi skógarins.
Lemos og Lehmann búa og starfa á Hvolsvelli en hafa jafnframt verið mjög virk á alþjóðlegum vettvangi. Verk þeirra hafa verið sýnd í fjölmörgum löndum víðs vegar um heiminn og má þar nefna sýningar á Spáni, í Portúgal og í Japan. Þá eru þau einnig stofnendur og stjórnendur menningarsamtakanna BONFIRE. List þeirra hverfist oft um tengsl manns og náttúru, vistfræði og rannsóknir á lífrænum efnum.
Markmið viðburðarins um helgina er að bjóða gestum upp á rólega stund til að tengjast landslaginu og njóta náttúrunnar í sameiningu. Eftir formlega opnun verkanna verður boðið upp á sameiginlega göngu þar sem áhersla er lögð á að hlusta, skynja og kanna umhverfið í gegnum leik og athygli.
Verkefnið nýtur stuðnings frá Menningarsjóði Rangárþings eystra. Viðburðurinn er opinn öllum sem vilja mæta og eiga góða stund í Tumastaðaskógi.
