Sunnudaginn 25. janúar opnar Listrými dyr sínar í nýju húsnæði að Mánamörk 3-5 í Hveragerði. Listrými er vinnustofa og sýningarrými þar sem einnig verður boðið upp á fjölbreytt námskeið í myndlist.
Guðrún Arndís Tryggvadóttir er eigandi Listrýmis en hún er starfandi myndlistarmaður með langa reynslu af námskeiðahaldi í myndlist en hún hefur m.a. rekið eigin skóla, kennt við listaskóla, listaháskóla og haldið og skipulagt fjölda námskeiða á undanförnum árum og áratugum.
Megin áhersla Listrýmis er, auk þess að vera vinnustofa Guðrúnar og sýningarrými, að bjóða upp á fjölbreytt námskeið, bæði í hugmyndaþróun sem og efnisnotkun. Fyrsta námskeið Listrýmis verður í módelteikningu í febrúar.
Sem fyrr segir er opnunin á sunnudag og er öllum velkomið að líta við á milli kl. 14:00 og 18:00.
Nánari upplýsingar um verk og feril Guðrúnar er að finna á vefnum tryggvadottir.com.