Klara Einars sendi frá sér nýja lagið „Ef hann myndi“ fyrir viku og fylgir þar með eftir laginu „Kominn heim“, sem naut mikilla vinsælda í vetur og vor. Nýja lagið hefur fengið góðar viðtökur á streymisveitum og er nú komið í spilun á Rás 2.
Með Ef hann myndi heldur Klara áfram farsælu samstarfi sínu við Dagbjart „Daybright“ Jónsson, sem hefur verið hennar helsti samstarfsmaður í lagasmíðum og upptökum síðustu misseri.
Framundan eru annasamar vikur hjá Klöru. Næstkomandi föstudag stígur hún á svið á hátíðinni Eldur í Húna á Hvammstanga, um verslunarmannahelgina kemur hún fram á Þjóðhátíð í Vestmannaeyjum og strax að lokinni verslunarmannahelgi heldur hún síðan áfram á Sumar á Selfossi, þar sem hún kemur fram á stórri kvöldvöku á fimmtudagskvöldinu.
Ljúfsárt sumar popp
Ef hann myndi er ljúfsárt popplag sem fjallar um ástina, lífið og hugsanirnar sem sitja eftir þegar fólk veltir fyrir sér því sem hefði getað orðið. Líkt og í Kominn heim fær textinn mikið vægi og enn á ný sýnir Klara þann styrk sem hún hefur verið að þróa sem textahöfundur, á sama tíma og hún heldur áfram að móta sinn eigin hljóðheim.
Lagið er samið af Klöru, Daybright og norska lagahöfundinum Jesse Steelman. Það var að stærstum hluta tekið upp í LIMPI-hljóðverinu í Lillehammer í Noregi í vor og er þar með fyrsta lag Klöru sem unnið er að svo stórum hluta erlendis.