Hin gríðarlega vinsæla Njálusýning, Upp með Njálu, er nú loksins á leið heim í hérað en tvær sýningar verða sunnudaginn 10. maí næstkomandi, klukkan 14 í Hvolnum á Hvolsvelli og klukkan 20 á Sviðinu á Selfossi.
Þau Guðni Ágústsson, Ólína Kjerúlf Þorvarðardóttir og Gissur Páll Gissurarson hafa flutt Njáluperlur í Salnum í Kópavogi við góðar undirtektir og góða aðsókn. Á sýningunni er Brennu-Njálssaga sett í nýjan og spennandi búning og skreytt með óperusöng Gissurar Páls, sem syngur rammíslensk lög og Skarphéðinn í brennunni við undirleik Matthildar Önnu Gísladóttur.
Engum vafa er undirorpið að þetta stórkostlega bókmenntaverk á sér sterkar rætur í íslenskri þjóðarsál. Hin meitlaða frásögn af köldum kvennaráðum, einlægri vináttu, miskunnarlausum hefndarþorsta, ástum, átökum og örlögum litríkra sögupersóna magnast í meðförum þeirra Guðna og Ólínu sem hér hafa þjappað sögunni saman og mæla hana af munni fram eins og þeim er einum lagið.
Þau kallast á við Gissur Pál, sem hefur alla tíð lagt mikla rækt við gamla íslenska söngtónlist og er því svo sannarlega réttur maður á réttum stað í þessari sýningu.