Njálufélagið efnir til Njálureiðar laugardaginn 22. ágúst næstkomandi en þá verður riðið frá Fljótshlíðarrétt að Káragerði í Landeyjum.
Guðni Ágústsson, formaður Njálufélagsins, hefur sent út boð um reiðina en mæting er kl. 11-13 í Fljótshlíðarrétt, hvaðan ferðin hefst. Síðan verður riðið um Landeyjar í Káragerði þar sem Kári Sölmundarson slökkti í fötum sínum eftir að hafa sloppið úr brennunni á Bergþórshvoli. Kári herti dignað sverðið svo í blóði Sigfússona og annarra brennumanna.
Hermann Árnason verður leiðangursstjóri en sagnamennirnir Lárus Bragason og Friðbjörn Garðarsson segja frá atburðum.
Íslensk kjötsúpa mun malla í pottum Bergþóru húsfreyju í umsjón þeirra Ástu í Seli og Diddu í Hólmi. Bjór frá Agli Skallagrímssyni verður kneifaður. Hinn rangæski gítar og söngsnillingur Hlynur Snær mun þenja strengina og reyna sönghæfni reiðmanna og annarra gesta. Það verður gleði og söngur og sögur í reiðhöllinni í Káragerði þetta kvöld. Þar ræður ríkjum Benjamín Sandur Ingólfsson, hestamaðurinn snjalli.
Allir eru velkomnir í reið eða sönginn en reiðskykkja Njálufélagsins er skilyrði fyrir þátttöku í reiðinni.
Allar frekari upplýsingar er að finna á heimasíðu Njálufélagsins og þar er hægt að ganga í Njálufélagið og gerast heiðursáskrifandi að Njálu Jóns Böðvarssonar, jólabókinni í
ár, með myndum Þórhildar Jónsdóttur frá Lambey í Fljótshlíð.