Úrval mynda úr smiðju myndlistarmannsins Elfars Guðna verður til sýnis og sölu í Listagjánni í Bókasafni Árborgar á Selfossi til og með 31. desember.
Yfirskrift sýningarinnar er Myndbrot og á hana hefur Elfar valið úrval verka frá mismunandi tímum. Alls eru fimmtán verk til sýnis og sölu í Listagjánni, vatnslita, pastel, túss og akrýl.
„Ég átti margara ára sælutíma í Þjórsárdal, nánar til tekið í Skriðufellsskógi. Þar urðu svarthvítu „túss á pappír“ myndirnar til með samvinnu við náttúruna,“ segir Elfar Guðni og bætir kíminn við að myndirnar séu ekki staðarlýsingar, þarna sé meira verið að höndla stemninguna.
Vatnslitamyndirnar á sýningunni koma frá ólíkum stöðum yfir langt tímabil.
Sýninguna er hægt að heimsækja á opnunartíma Bókasafns Árborgar.