
Barnabókahöfundurinn og Selfyssingurinn Sigríður Etna Marinósdóttir hefur sent frá sér sína fimmtu bók. Bókin ber heitið Heimir hugrakki & lífið í leikskólanum og er sagan byggð á sönnum atburðum.
Bókin fjallar um músina Heimi sem læðist inn í leikskólann Álfheima á Selfossi. Þar er líf og fjör og nóg um að vera. Það verður uppi fótur og fit þegar það uppgötvast að það sé komin mús inn í skólann. Hefst þá leitin að Heimi.
„Árið 2024 átti ég tvö börn í leikskólanum Álfheimum hér á Selfossi. Einn daginn komst mús inn á leikskólann og gerði starfsfólkinu lífið leitt. Það gekk eitthvað erfiðlega að ná henni og voru börnin mikið að velta þessari mús fyrir sér. Ég og börnin mín fórum að ímynda okkur hvað hún væri eiginlega að gera í leikskólanum þegar allir væru farnir heim í lok dags og þá kviknaði þessi hugmynd,“ segir Sigríður Etna í samtali við sunnlenska.is.

Líður vel á Selfossi
Fimm ár eru síðan Sigríður Etna sendi síðast frá sér bók. Sem fyrr segir er Heimir hugrakki & lífið í leikskólanum fimmta bókina hennar. Fyrri bækur Sigríðar Etnu eru Etna og Enok fara í sveitina, Etna og Enok hitta jólasveinana, Etna og Enok ferðast um Ísland og Hasar í hrauninu. Fyrsta bókin kom út árið 2017 en bækurnar eru allar myndskreyttar af Freydísi Kristjánsdóttur, sem er einmitt frænka Sigríðar Etnu.
„Þetta er þægileg bók til að lesa fyrir börn á leikskólaaldri. Góð bók fyrir börn í fyrstu árgöngum að lesa sjálf. Þannig hún ætti að henta börnum frá 0-8 ára. Bókin er núna komin í sölu í Pennanum, Forlaginu og Bókakaffinu á Selfossi.“

„Nú hef ég skrifað bók sem gerist á Tálknafirði, þar sem ég er fædd og uppalin. Hasar í hrauninu gerist í og við Grindavík þar sem við fjölskyldan bjuggum áður. Núna höfum við búið á Selfossi í að verða fjögur ár og finnst mér ótrúlega gaman að hafa gert bók sem gerist hér á svæðinu. Fjölskyldunni líður vel á Selfossi og það hefur verið tekið svo vel á móti okkur,“ segir Sigríður Etna að lokum.

