Með Faðmlög í farteskinu

Svavar Knútur og Kristjana Stefáns. Ljósmynd/Gunnar Freyr

Úr drunga og doða sóttkvía og -kvíða rís söngur og gleði eins og fuglinn Fönix úr öskunni. Kristjana Stefáns og Svavar Knútur geysast nú um landið á sinni árlegu sumartónleikaferð undir yfirskriftinni Með Faðmlög í farteskinu.

Á ferð sinni heimsækja Kristjana og Svavar Knútur alla helstu landsfjórðungana en þrennir tónleikar verð á Suðurlandi. Miðvikudaginn 15. júlí kl. 20 í Úthlíðarkirkju í Biskupstungum, föstudaginn 17. júlí kl. 21 í Eyvindartungu við Laugarvatn og laugardaginn 18. júlí kl. 21 í Skyrgerðinni í Hveragerði.

Á tónleikunum munu þau Kristjana og Svavar Knútur bæta fyrir þyngsl vormánaðanna sem skriðu hjá í móki samkomubanns með húmor og hlýju, krúttlegum kvöldsöngvum, angurværum Abbalögum og sígildum söngperlum. Þá munu sagðar sögur, lesin ljóð og klassísk íslensk kvöldvökustemmning höfð í hávegum. Það verður stutt í hláturinn og líka í tárin, enda víða komið við í lystigarði mannlegrar tilvistar.

Kristjana og Svavar hafa síðan 2008 haft unun af því að syngja saman dúetta og komið fram víða um land við gríðargóðar undirtektir. Nú ferðast þau um landið þvert og endilangt með splunkunýja dúettaplötu í farteskinu, en hún ber nafnið Faðmlög.