Myndlistarnemar við Fjölbrautaskóla Suðurlands hafa sett upp sýninguna Með blýant að vopni í Sundhöll Selfoss.
Í áfanganum, sem er framhaldsáfangi í teikningu, er eingöngu unnið með blýant eins og nafn sýningarinnar ber með sér. Nemendur hljóta þjálfun í alls konar fríhendis blýantsteikningum, skyggingum náttúru, hluta, manna og dýra og reyna að ná raunsæjum og súrrealískum áhrifum.
Enn fremur er áhersla á áferðir ýmis konar og meðvitaða myndbyggingu. Það fylgir öllum framhaldsáföngum myndlistar að halda sýningu í opinberu rými, enda ákveðið nám sem felst í sýningarundirbúningi. Að auki þurfa nemendur að skila greinargerð með hverju fullloknu verki þar sem þeir íhuga og rökstyðja í máli og myndum sína nálgun, myndbyggingu og innihald svo eitthvað sé nefnt. Kennari áfangans var Ágústa Ragnarsdóttir
Verk úr fjórum af fimm verkhlutum áfangans eru til sýnis. Fyrsti verkhluti kallast Náttúran nær og fjær, í öðrum verkhluta eru það Hlutir og dýr sem fókusað er á, þriðji verkhluti er Portrett, í fjórða verkhluta er farið á dýptina í tveggja punkta fjarvídd sem síðan er nýtt í Lokaverkefni þar sem þættir úr öllum fyrri verkhlutum tvinnast saman.
Útkoman er fjölbreytt og forvitnileg sýning þar sem fjölmörg falleg og áhugaverð verk eru til sýnis. Sýningin er sem fyrr segir í Sundhöll Selfoss og stendur yfir frá 16. september til 13. október.
