Matarkistan Hrunamannahreppur er sannarlega blómleg sveit með myndarleg býli af öllum stærðum og gerðum. Árviss Uppskeruhátíð verður haldin á Flúðum og nágrenni næstkomandi laugardag, þann 3. september.
Nú þegar halla fer sumri eru haustverkin í fullum gangi, uppskera og undirbúningur fyrir göngur og réttir. Ýmislegt verður í boði fyrir gesti og gangandi þennan dag og hægt að njóta í rólegheitum.
Dagurinn hefst með hefðbundinni Uppskerumessu og leikjum í Hrunakirkju en eftir hádegi verður markaður í félagsheimilinu á Flúðum með brakandi ferska uppskeru frá garðyrkjubændum, ýmsar vörur beint frá býli, bakkelsi, kruðerí í krukkum og fjölbreytt handverk.
Það verður opið hús hjá handverksfólki í Bjarkarhlíð og Laugalandi þar sem hægt er að líta við og opið kúabú í Bryðjuholti þar sem gestir geta kíkt í fjós. Boðið er upp á kynningu á ræktun og innlit í klefa hjá Flúðasveppum og árvisst opið grænmetis-golfmót fer fram á Selsvelli. Litla bændabúðin, Litla húsið og Hús minninganna verða opin.
Þá verður einnig boðið upp á sögugöngu með leiðsögn um Flúðir, útileiki, frisbígolf og sund. Veitingastaðir eru opnir og ýmis tilboð í gangi.
Allt nánar um dagskrána og tímasetningar má finna á www.sveitir.is.