Það stefnir í það að Már Gunnarsson afreksmaður verði meðal þeirra fyrstu sem koma fram á Sviðinu, nýju lögheimili lifandi tónlistar í miðbæ Selfoss sem opnar á næstunni í Friðriksgáfu samkomuhúsi.
Tónleikar Más verða á Sviðinu þann 2. september og eru þeir hluti af síðsumars tónleikaferð Más, til að fjármagna tónlistarnám sem hann er að fara að stunda í Bretlandi en hann flytur þangað í byrjun september.
Már hefur ákveðið að leggja sundferilinn á hilluna, aðeins 22 ára gamall, og einbeita sér að tónlistinni. Már er einn af sigursælustu sundmönnum landsins og hefur verið meðal fremstu blindu sundmanna heims undanfarin ár. Hann á heimsmet í baksundi og setti 28 sinnum Íslandsmet. Hann vann til bronsverðlauna á heimsmeistaramótinu í London árið 2019 og keppti á Ólympíuleikunum í Tókýó í fyrrahaust.
Tónlistin hefur fylgt Má alla tíð, frá því að hann byrjaði að æfa sjö ára í Lúxemborg. Már segist hafa afrekað nógu mikið í sundinu til að hann geti stigið sáttur frá því.
Núna í júní fékk Már staðfestingu á að hann kæmist inn í breskan tónlistarháskóla, Academy of Contemporary Music í Guilford. Þetta segir hann gamlan draum en í náminu mun hann læra lagasmíði, framkomu og fleira til að styrkja sig sem tónlistarmann. Már vinnur nú að nýju efni sem kemur út í sumar, sem útsett er af honum og Þóri Úlfarssyni.
Þetta verða í senn kveðjutónleikar Más áður en hann heldur út og fjáröflun til að styrkja hann til námsins, sem er langt frá því að vera ókeypis. Á tónleikunum verður flutt bæði gamalt íslenskt efni í nýjum búningi og ný lög eftir Má. Hann kemur fram ásamt fimm manna hljómsveit og valdir gestir verða á hverjum stað fyrir sig.
25. ágúst: Sjáland, Garðabæ
1. september: Hljómahöllin Reykjanesbæ
2. september: Sviðið á Selfossi