Það eru fáir viðburðir á Íslandi sem hafa skapað jafn mikla stemningu síðasta árið og Mamma Mia Party á Sviðinu í Miðbæ Selfoss. Sýningarnar hafa trekk í trekk selst upp og nú, rúmu ári síðar, virðist engin lægð vera í sjónmáli.
„Við erum eiginlega ennþá að reyna að átta okkur á þessu,“ segir Fríða Hansen söngkona og kynnir kvöldsins brosandi. „Það eru einhverjir alveg sérstakir töfrar sem gerast þegar ABBA lögin byrja að óma og fólk syngur saman. Þá breytist allt andrúmsloftið.“
Kvöldið er langt frá því að vera hefðbundnir tónleikar. Gestir taka virkan þátt frá fyrstu mínútu með Sing Along stemningu, pubquiz-i og hinum sívinsæla kóngadansi sem er alltaf tekinn út á torginu í miðbæ Selfoss við mikinn fögnuð vegfarenda.
„Þetta er algjör gleðisprengja,“ segir Fríða. „Það eru alltaf allir skælbrosandi. Fólk mætir hingað til að syngja, dansa og gleyma sér aðeins. Það er eiginlega það fallegasta við þetta.“
Mamma Mia Party hefur laðað að sér fjölda gesta af höfuðborgarsvæðinu og hefur orðið vinsæll áfangastaður fyrir vinkonuhópa, saumaklúbba og hópa sem gera sér dag úr ferð yfir heiðina.
„Margir byrja á að rölta um miðbæ Selfoss, fara í verslanir eða fá sér að borða og enda svo kvöldið hjá okkur á Sviðinu. Þetta er orðið svona heil kvöldupplifun fyrir marga.“
Á meðan nýir gestir halda áfram að streyma að, eru Selfyssingar sjálfir orðnir fastagestir.
„Ég held að flestir á Selfossi séu búnir að mæta að minnsta kosti einu sinni og margir tvisvar eða oftar,“ segir Fríða og hlær. „Fólk kemur aftur því stemningin verður alltaf svo skemmtileg.“
Fríða Hansen hefur stýrt Mamma Mia Party frá fyrsta degi og segir hún ótrúlegt að hugsa til þess hversu langt verkefnið sé komið.
„Við erum líklega að nálgast annan tug sýninga sem er eiginlega galið að hugsa til. Maður finnur líka hvað fólk er farið að tengja sterkt við þetta kvöld.“
Síðasta sýning vorsins verður haldin næsta föstudag áður en viðburðurinn fer í sumarfrí fram á haust en það er uppselt.
„Við ætlum að taka smá pásu yfir sumarið, safna orku og koma svo aftur í haust með enn meiri stemningu,“ segir Fríða að lokum. „ABBA klikkar einfaldlega aldrei.“
