Hljómsveitin Hr. Eydís hefur gert ábreiðu af hinu sígilda ´80s lagi Ghostbusters með Ray Parker jr. Lagið kom upphaflega út árið 1984 sem titillag samnefndrar kvikmyndar og varð eitt þekktasta kvikmyndalag áratugarins. Ábreiðan er nú komin út á YouTube-rás sveitarinnar og má sjá hér að neðan.
Ghostbusters fór alla leið í fyrsta sæti Billboard Hot 100-listans í Bandaríkjunum og sat þar í þrjár vikur. Lagið náði einnig öðru sæti breska vinsældalistans og var tilnefnt til Óskarsverðlauna fyrir besta frumsamda lagið.
Skemmtileg saga er á bak við tilurð lagsins. Ray Parker jr. fékk aðeins tvo daga til að semja það fyrir kvikmyndina. Lagið sjálft kom tiltölulega fljótt en erfiðara reyndist að finna leið til að koma nafninu „Ghostbusters“ inn í textann. Lausnin kom seint um nótt þegar Parker sá sjónvarpsauglýsingu þar sem áhorfendur voru hvattir til að hringja eftir þjónustu. Þá kviknaði hugmyndin að spurningunni „Who ya gonna call?“ og að láta hóp svara „Ghostbusters!“ Úr varð ein þekktasta lína ´80s poppsins.
Nýja ábreiðan tengist hausttúr Hr. Eydís í ár, ALVÖRU ´80s PARTÝ – MOVIE HITS, sem verður helgaður lögum úr kvikmyndum ’80s tímabilsins.
„Það er eiginlega ekki hægt að gera heila tónleika með ´80s kvikmyndalögum án þess að Ghostbusters komi þar við sögu. Þetta er eitt af þessum lögum sem allir þekkja eftir örfáar sekúndur og það er ótrúlega gaman að spila það,“ segir Örlygur Smári, einn meðlima Hr. Eydís.
Á hausttúrnum heimsækir hljómsveitin, ásamt Ernu Hrönn, Græna hattinn á Akureyri, Sviðið á Selfossi og Háskólabíó í Reykjavík. Nánari upplýsingar um tónleikana og aðgengi að miðum má finna á tix.is og graenihatturinn.is.