Bókakaffið á Selfossi býður upp á einstaka menningardagskrá ljóðlistar og tóna næstkomandi fimmtudagskvöld 16. apríl. Dagskráin hefst klukkan 20 og stendur í um klukkutíma. Allir velkomnir meðan húsrúm leyfir. Kaffi, kakó og smákökur.
Hljómsveitin Steinalda mun flytja tvö verk í fjórum þáttum eftir Guðmund Stein Gunnarsson tónskáld, en það eru Hugleiðingar um sorphirðu og hreinlæti og Hugleiðingar um skaðsemi eiturlyfja. Þá mun ljóðaþýðandinn Atli Harðarson lesa úr nýútkominni bók sinni Sálarljóð. Atli er prófessor emeritus og fyrrverandi skólameistari Fjölbrautaskólans á Akranesi.
Hljómsveitina Steinöldu skipa Þórunn Björnsdóttir (bassablokkflauta og fleira), Steinunn Vala Pálsdóttir (altflauta og fleira), Ásthildur Ákadóttir (wurlitzer rafmagnshljómborð og fleira), Óskar Magnússon (gítar eða gítarlele), Guðmundur Steinn Gunnarsson (mandólín, slagverk og fleira), Páll Ivan frá Eiðum (banjó, slagverk og fleira) og Andrés Þór Þorvarðarson (slagverk og fleira).
