Hinsegin vika Sveitarfélagsins Árborgar verður haldin hátíðleg í fimmta sinn dagana 2. til 7. mars. Dagskrá vikunnar er fjölbreytt og höfðar til ólíkra aldurshópa.
Markmið Hinsegin viku Árborgar er að efla fræðslu um hinsegin málefni og stuðla að auknum skilningi í samfélaginu. Jafnframt er lögð áhersla á að auka sýnileika hinsegin fólks og vekja athygli á mikilvægi öryggis, jafnréttis og virðingar.
„Með vikunni viljum við einnig styrkja jákvæða og uppbyggilega umræðu þar sem ólík sjónarmið fá að heyrast og skapa rými fyrir þátttöku allra, óháð kyni, kynhneigð, kynvitund eða bakgrunni. Með því að draga þessi málefni fram í dagsljósið er leitast við að byggja samfélag þar sem fjölbreytileikinn er viðurkenndur og honum fagnað,“ segir Ellý Tómasdóttir, verkefnastjóri frístundaþjónustu og forvarnarfulltrúi Árborgar.
Hinsegin vikan verður sett í sal Fjölbrautaskóla Suðurlands mánudaginn 2. mars kl. 19:30. Bragi Bjarnason, bæjarstjóri setur vikuna og Sindri Sparkle verður með uppistand og fræðslu um hinsegin fánana.
Fjöldi viðburða verður í gangi alla vikunar, myndlistarsýning frá hinsegin Zelsíuz verður í stigagangi ráðhússins alla vikuna, á miðvikudag verður regnbogadagur og á föstudagskvöld munu dragdrottningar skemmta á Sviðinu í miðbæ Selfoss. Fjölskyldusamvera verður á bókasafni Árborgar á Selfossi laugardaginn 7. mars kl. 11 til 13 og GK bakarí mun bjóða upp á skrautlegt bakkelsi alla vikuna.
Nánari upplýsingar um dagskrána má finna á vefsíðu sveitarfélagsins.