Listrænar Þykkvabæjarvalkyrjur með sýningu í nýja Hlöðueldhúsinu

Listakonur hjá verkum sínum eða í þeim! Hrönn heldur á sandkúlu sinni, Borghildur er með afurðir leðurjakka úr Þykkvabæ framan á sér og á höndum og Halldóra stendur á milli amboða sem hún gerði. Ljósmynd/Atli Rúnar Halldórsson

Fjölmenni mætti í opið hús í Hlöðueldhúsinu í Þykkvabæ í dag, 17. júní, þar sem þrjár listakonur efndu til sýningar á verkum sínum á heimavelli.

Gestir kynntu sér þannig annars vegar glæsileg húsakynni og starfsemi nýs matarupplifunarfyrirtækis í Oddsparti og hins vegar listmuni og handverk sýnendanna þriggja.

Listakonurnar í Þykkvabæ eru Borghildur Ingvarsdóttir í Vatnskoti, Halldóra Hafsteinsdóttir í Hákoti og Hrönn Vilhelmsdóttir í Oddsparti.

Borghildur er hönnuður og einn eigenda verslunarinnar Kirsuberjatrésins í Reykjavík. Hún kann öðrum fremur að endurnýta ýmislegt sem lagt hefur verið til hliðar og sýndi þarna hluti sem unnir voru úr forláta leðurjakka sem hún fékk gefins í Þykkvabæ!

Halldóra eða Dóra er kartöflubóndi og leirlistakona, Þykkbæingur í húð og hár. Hún sýndi leirverk.

Hrönn er textíllistamaður og sýndi textíl og sandverk. Þau Þórólfur Antonsson keyptu Oddspart 2017 og hafa ásamt Hauki Sigvaldasyni smiði breytt útihúsum þar í veislusal og eldhús fyrir starfsemi Hlöðueldhússins. Fyrirtækið fékk starfsleyfi fyrir fáeinum dögum og er að hefja rekstur sem felst í því að taka á móti 10 til 16 manna hópum vina, vinnufélaga eða annarra til að elda saman og njóta sannkallaðrar matarupplifunar. Jafnframt verður rekin veisluþjónusta fyrir stærri hópa, allt að 50 manns í einu.

Ljósmynd/Atli Rúnar Halldórsson
Ljósmynd/Atli Rúnar Halldórsson
Ljósmynd/Atli Rúnar Halldórsson
Ljósmynd/Atli Rúnar Halldórsson
Ljósmynd/Atli Rúnar Halldórsson