Byggðasafn Árnesinga býður gesti velkomna í fjölbreytta dagskrá í október þar sem boðið verður upp á skapandi smiðju, fræðslufyrirlestur og sérstaka leiðsögn um safnið.
Safnið verður opið alla sunnudaga í október frá kl. 13 til 17 og aðgangur er ókeypis. Gestir geta skoðað Húsið, Kirkjubæ, Eggjaskúrinn og Sjóminjasafnið.
Sunnudaginn 4. október frá kl. 14 til 16 verður haldin Rollusmiðja í fjárhúsi safnsins á Eyrarbakka. Þar fá gestir á öllum aldri tækifæri til að þæfa sínar eigin rollur og aðrar furðuverur úr íslenskri ull undir leiðsögn hönnuðarins og starfsmanns safnsins Auðar Aspar Gilsdóttur.
Sunnudaginn 18. október kl. 14 flytur Linda Ásdísardóttir, safnafræðingur og sérfræðingur hjá Byggðasafni Árnesinga, erindi undir heitinu „Safnarúntur á Grænlandi“. Þar segir hún frá reynslu sinni sem sjálfboðaliði á minjasöfnum á Vestur- og Suður-Grænlandi árin 2013 og 2019. Fyrirlesturinn verður haldinn í Varðveisluhúsi safnsins við Búðarstíg 22.
Sunnudaginn 25. október kl. 14 býður Lýður Pálsson, safnstjóri Byggðasafns Árnesinga, upp á leiðsögn um nýlegar sýningar safnsins. Farið verður um sýningarnar „Yfir beljandi fljót“, „Bjargvætturinn“ og „Bátar og býli“, auk heimsókna í fjósið norðan Hússins og Beitningaskúrinn við Óðinshús. Leiðsögnin hefst í Húsinu á Eyrarbakka.
Allir viðburðir eru opnir almenningi og aðgangur ókeypis.
