Leikfélag Selfoss frumsýnir Maríusögur

Leikfélag Selfoss fumsýnir í kvöld hinn gamansama harmleik Maríusögur eftir Þorvald Þorsteinsson. Leikstjóri er Guðfinna Gunnarsdóttir og eru leikarar fimm talsins.

Leikritið gerist á (æsku)heimili Stefaníu, hugulsömu húsmóðurinnar, og Þráins, eiginmanns hennar. Tilefnið er fráfall föður Stefaníu. Marteinn bróðir hennar er þar mættur, eftir margra ára dvöl í Svíþjóð, og er alls ekki kátur þegar María, æskuvinkona þeirra systkina, kemur í heimsókn með nýjasta kærastann.

Stefanía gerir allt hvað hún getur til að halda umræðunum frá því sem ekki má ræða en hættulegt leyndarmálið kemur að lokum upp á yfirborðið og María fær loks tækifæri til að gera upp syndir fortíðarinnar, eða svo heldur hún…

Verkið var samið fyrir útskriftarhóp Leiklistaskóla Íslands 1995 og hefur ekki verið sett upp síðan, fyrr en nú.

Önnur sýning er á sunnudagskvöld en sýningarfjöldinn er takmarkaður við átta sýningar og verður lokasýningin laugardaginn 9. nóvember.