Vetrarstarf Karlakórs Selfoss er að hefjast núna þegar vetur nálgast. Aðalfundur kórsins var haldinn 28. ágúst síðastliðinn og þar var kjörin stjórn, en hana skipa; Ómar Þór Baldursson, formaður og aðrir stjórnarmenn eru Þórir Haraldsson, Einar Hermundsson, Björgvin R. Snorrason, Jóhann Pétur Jóhannsson og Unnar Steinn Guðmundsson.
Kynningarkvöld, þar sem farið verður yfir starfsemi komandi vetrar og nýir söngmenn boðnir velkomnir, verður haldið mánudagskvöldið 25. september kl. 19:30. Fyrsta æfing vetrarins verður síðan mánudagskvöldið 2. október kl. 19:30 í félagsheimili kórsins að Eyravegi 67.
Komandi starfsár er það 59. í sögu kórsins, sem var stofnaður 1965. Mörg spennandi og skemmtileg verkefni eru framundan og söngskrá vetrarins verður væntanlega kynnt á fyrstu æfingunni, en æft verður einu sinni í viku, á mánudagskvöldum kl. 19:30-22:00.
Fastir punktar í vetrarstarfinu eru jólatónleikar sem haldnir verða í Selfosskirkju og Skálholtskirkju í desember. Þá eru vortónleikar kórsins áformaðir í Selfosskirkju samkvæmt venju á sumardaginn fyrsta, 25. apríl 2024 og þriðjudaginn 30. apríl, svo verður sungið í Fella- og Hólakirkju fimmtudaginn 2. maí og lokatónleikar verða svo í Skálholtskirkju laugardaginn 4. maí 2024. Hugmyndir eru uppi um sérstaka söngferð til Salzburg næsta vor, sem verður væntanlega kynnt síðar á starfsárinu.
Um og yfir 70 söngmenn hafa starfað með kórnum undanfarin ár. Stjórnandi kórsins undanfarin átta ár er Skarphéðinn Þór Hjartarson og píanóleikari Jón Bjarnason, sem starfað hefur með kórnum í tólf ár.
Nýir félagar eru sérstaklega boðnir velkomnir og eldri söngmenn eru hvattir til að mæta.