Kynna landnám í Vesturheimi

Einstakt ferðalag á slóðir Vesturfara verður kynnt í Húsinu á Eyrarbakka í dag kl. 14 og eru allir velkomnir.

Svonefnt Vesturfaratímabil hófst á Íslandi árið 1870 og því lauk 1914. Á hverju ári tímabilsins fóru einhverjir af Íslandi vestur um haf. Talið er að um 15 þúsund Íslendingar hafi þá flutt til Vesturheims.

Upphaf vesturferðanna má rekja til Eyrarbakka. Þaðan fóru fyrstu vesturfararnir 1870 og segja má að þeir mótuðu nokkuð stefnuna fyrstu árin. Ákvörðun þeirra að fara til Wisconsin í Bandaríkjunum leiddi fleiri á sömu slóðir.

Bændaferðir og Þjóðræknisfélag Íslendinga undibúa ferð næsta vor á þessar slóðir og hefst undirbúningurinn með sérstöku námskeiði í október. Jónas Þór hjá Bændaferðum kynnir námskeiðið og fyrirhugaða ferð, ókeypis aðgangur og heitt á könnunni.