Tónleikarnir Krakkabarokk á Suðurlandi verða haldnir í Selfosskirkju sunnudaginn 11. maí og hefjast þeir kl. 15:00.
Það er kammerhópurinn Reykjavík Barokk sem stendur fyrir tónleikunum en í aðdraganda þeirra mun hópurinn æfa með nemendum Tónlistarskóla Rangæinga og kórs Hvolsskóla á Hvolsvelli á föstudag og laugardag.
Á tónleikunum í Selfosskirkju á sunnudaginn mun ReykjavíkBarokk flytja fjölbreytta tónlist frá barokktímanum í félagi við tónlistarnemendur og kórsöngvara.
Á tónleikunum fá áheyrendur að heyra einleik, samleik og kórsöng með undirleik hátíðarhljómsveitar Krakkabarokks. Auk Reykjavík Barokk koma fram nemendur úr Tónlistarskóla Rangæinga, Kór Hvolsskóla og orgelkrakkar Tónskóla Þjóðkirkjunnar.
Aðgangur er ókeypis og öllum heimill meðan húsrúm leyfir. Tónleikarnir og verkefnið Krakkabarokk er styrkt af Uppbyggingarsjóði Suðurlands og Barnamenningarsjóði.