Uppskeruhátíðin Haustgildi, menning er matarkista, verður haldin í sjötta sinn á Stokkseyri um næstu helgi, 5.-9. september.
Hátíðin er bókmenntahátið Bókabæjanna austan fjalls og hafa fjölmargir rithöfundar komið og heimsótt Stokkseyri þessa fyrstu helgi í september.
Í ár munu rithöfundarnir Nína Ólafsdóttir, Ingi Markússon, Lóa H. Hjálmtýsdóttir, Una Margrét, Jónsdóttir, Steinunn Sigurðardóttir, Sigríður Hagalín Björnsdóttir og Ægir Þór taka þátt í hátíðinni.
Upplestur og tónlist
Aðalviðburðurinn á Haustgildi í ár verður upplestur Lóu og Unu Margrétar. Harpa Rún Kristjánsdóttir, rithöfundur, ritstjóri og útgefandi, heldur utan um spjall um skrif þeirra og veltir fyrir sér gildi þess að kátína og komedía fái að njóta sín í samtímanum.
Tónlist hefur svo verið alltaf verið hluti af Haustgildi. Eyjólfur Eyjólfsson og Luke Starkey riðu á vaðið á fyrsta Haustgildi og slógu tóninn fyrir því hvernig tónlist myndi hljóma á Haustgildi. Í fyrra voru svo Ingibjörg Elsa Turchi, Hróðmar Sigurðsson og Sólrún Mjöll Kjartansdóttir sem spiluðu svo eftirminnilega tónleika í Stokkseyrarkirkju. Þau Ingibjörg og Hróðmar spila svo aftur á Haustgildi í ár á Fjöruborðinu laugardaginn 5. september klukkan 15 ásamt Magnúsi Trygvasyni Eliasen trommara.
Jónas Sig í Stokkseyrarkirkju
Jónas Sig og hljómsveit halda tónleika í Stokkseyrarkirkju sunnudaginn 6. september klukkan 17. Markús & The Diversion Sessions munu hita upp.
Jónas þarf vart að kynna. Hann kom fyrst fram á sjónarsvið íslenskrar tónlistar með hljómsveitinni Sólstrandagæjunum en svo skaut honum aftur upp á stjörnuhiminn þegar hann gaf frá sér plötuna Þar sem malbikið svífur mun ég dansa. Hún kom út 2007 og nokkrum árum seinna gaf hann út efni sem hann hafði unnið með Lúðrasveit Þorlákshafnar, sínum heimabæ. Mögnuð textagerð og sterkar melódíur hafa verið einkennandi fyrir tónlist Jónasar sem nær að snerta streng í íslenskri þjóðarsál.
Markús Bjarnason hefur komið víða við í íslenskri tónlist. Hann hefur verið fararbroddi hljómsveita á borð við Sofandi og Skáta. Jafnframt hefur hann unnið að sínu sólóefni. Hljómsveitin hans The Diversion Sessions hefur spilað með honum í ýmsum myndum í mörg ár. Núna er hljómsveitin að gefa út glænýtt efni sem hefur fengið góðar viðtökur hjá hlustendum. Miðasala er á tix.is.
Matvörur og listmunir á markaðnum
Eins hefur alltaf verið markaður á Haustgildi enda sannarlega hluti af upphaflegu hugmyndinni á bakvið hátíðina – að geta boðið upp á framleiðslu og vörur úr nágrenninu.
Listamenn á Stokkseyri hafa líka tekið þátt í Haustgildi með því að opna dyr á galleríum sínum þessa helgi sem Haustgildi stendur. Heba keramík, Gussi Gallerí, Gallerí Gimli og Gallerí Svartiklettur eru þau frábæru gallerí sem eru á Stokkseyri og verða opin þessa helgi.
Þau sem standa á bak við Haustgildi eru Bókabæirnir austanfjalls sem hefur fengið styrki úr Uppbyggingarsjóð Suðurlands til að standa að hátíðinni. Sveitarfélagið Árborg hefur líka stutt hátíðina með ráð og dáð. Frekari upplýsingar má finna á haustgildi.is.