Jón Sigurðsson forseti fær góð eftirmæli í fjörlegri dagskrá í þjóðgarðinum á Þingvöllum næstkomandi fimmtudagskvöld. Kvöldið er það fyrsta í fimmtudagsdagskrá þjóðgarðsins í sumar og hefst við Hakið kl. 20:00.
Samkoman verður leidd af Guðna Ágústssyni, fyrrverandi alþingismanni og ráðherra, og ber kvöldið yfirskriftina: Þingvallahátíð! Jón Sigurðsson forseti og frelsishetja.
Dagskráin verður fjölbreytt en þar mun Karlakór Selfoss syngja nokkur lög, leikkonan Svandís Dóra Einarsdóttir flytur ljóð og Lilja Dögg Alfreðsdóttir, formaður Framsóknarflokksins, minnist Jóns Sigurðssonar. Þá mun Gunnlaugur Bjarnason, óperusöngvari, flytja ljóð Hjálmars Jónssonar Land og þjóð.