Jólatónleikar Sinfóníuhljómsveitar Suðurlands eru orðnir árlegur viðburður í menningarlífi Sunnlendinga og í ár verða þeir í Selfosskirkju laugardaginn 29. nóvember.
Að þessu sinni er efnisskrá jólatónleikanna sett saman með börn, ungmenni og fjölskyldur þeirra í huga og meðal verka á tónleikunum er tónlist Howard Blake úr teiknimyndinni um Snjókarlinn sem gerð var eftir sögu Raymond Briggs.
Jóhann G. Jóhannsson leikari verður sögumaður í flutningi verksins og auk hans koma Valgerður Guðnadóttir söngkona, barna- og unglingakórar Selfosskirkju og Söngfuglar Tónlistarskóla Árnesinga fram með hljómsveitinni sem skipuð verður 45 hljóðfæraleikurum. Hljómsveitarstjóri er Guðmundur Óli Gunnarsson.
Aðstandendur hljómsveitarinnar lofa skemmtilegum, fallegum og hátíðlegum tónleikum en þetta er í annað sinn sem jólatónleikar hljómsveitarinnar eru haldnir í Selfosskirkju.
Miðasala er á tix.is.
