Karlakór Selfoss heldur sína árlegu jólatónleika í Skálholti mánudaginn 8. desember og í Selfosskirkju þriðjudaginn 16. desember.
Jólatónleikar Karlakórs Selfoss eru ómissandi viðburður í jólaundirbúningi margra Sunnlendinga, efnisskráin er fjölbreytt og má þar finna ýmiskonar léttmeti ásamt hátíðlegum söng. Eitthvað sem kemur öllum í jólaskapið.
Sérstakur gestur á báðum tónleikunum er Berglind Magnúsdóttir söngkona en Berglind og kórinn eiga lag í Jólalagasamkeppni Rásar 2, Jólagjöfin í ár! eftir Björgvin Þ. Valdimarsson. Það verður frumflutt í lifandi flutningi á tónleikunum í Skálholti.
Stjórnandi Karlakórs Selfoss er Skarphéðinn Þór Hjartarson og hefur hann útsett mörg þeirra laga sem á efnisskránni eru. Píanóleikari kórsins er Jón Bjarnason.
Tónleikarnir í Skálholti hefjast klukkan 20 en tónleikarnir á Selfossi klukkan 20:30. Aðgangur er ókeypis en tekið er á móti frjálsum framlögum sem renna óskipt í Sjóðinn góða. Posi verður á staðnum á báðum tónleikunum.